Uns Mamm - Renate Fuchs

Uns Mamm

Vers
De Jässjer am Rhing lochen voll Sonnesching,
m´r spillten als kleine Trabant.
De Jässjer am Rhing lochen voll Sonnesching,
do hammer kein Sorje jekannt.
Wat wor dat e Jlöck wer denk do nit dran,
mer schrömten durch de Stroß.
Un jinge Latääne ovends dann aan,
mer hatten uns möd jeros.

Refrain / letzten 3 Zeilen wiederholen
Dann stund uns Mamm en de Dür
un hätt op uns jewaat,
ob et fröh wor oder spät.
Dann stund uns Mamm en de Dür
un lurten sich de Aure us,
se hatt kein Rauh bis mer all zohus.

Vers
Un wor m´r eech sechszehn wat wor dat en Freud,
dann hat m´r doch Ussjang bis nüng.
Un wor m´r eech sechszehn wat wor dat en Freud,
dann stund m´r dess ovends beim Tünn.
Wat wor dat e Jlöck wer denk do nit dran,
m´r wood bal stabeljeck.
Dann jing m´r nohus met Freud wie noch nie
un komm m´r dann öm de Eck.

Refrain
Dann stund uns Mamm en d´r Dür……

Vers
De Johre die kome un jinge dohin
un keiner hat je dran jedaach.
De Johre die kome un jinge dohin
och uns Mamm die jing fott övver Naach.
Mer woren allein dat künnt ihr verstonn
kom spät d´r Ovend eran.
Mer sochen ihr Bild vorövver dann jonn
doch alles wor leere Wahn.

Refrain
Dann stunten mer en d´r Dür
un waaten op uns Mamm,
die su off op uns jewaat.
Dann stunten mer en d´r Dür
un lurten uns de Aure uss,
doch uns Mamm die kom nie mieh noh hus